സര്‍ഗ്ഗം-7.കളകാഞ്ചി .

വൃത്തവൃത്താന്തം. സര്‍ഗ്ഗം-7.കളകാഞ്ചി .

=================================

മലയാളഭാഷാവൃത്തങ്ങളില്‍ കാകളികുടുംബത്തിലെ കാരണവരായ കാകളിവൃത്തത്തെയാണല്ലോ നമ്മള്‍ കഴിഞ്ഞതവണ പരിചയപ്പെട്ടത്. കാകളി നന്നായി മനസ്സിലായാലേ കളകാഞ്ചി പ്രയോഗിക്കാന്‍ കഴിയൂ. അതുകൊണ്ട് കഴിഞ്ഞ ഭാഗത്തില്‍ പഠിച്ച കാകളി ഓര്‍മ്മയില്ലെങ്കില്‍ ഒന്നുകൂടെ മറിച്ചുനോക്കി ഓര്‍മ്മവന്നതിനുശേഷംമാത്രം ഇതു പരിശീലിച്ചാല്‍മതി .

അഞ്ച് മാത്ര വരുന്ന മൂന്ന് അക്ഷരങ്ങള്‍ ഒരു ഗണം. അങ്ങനെ നാല് ഗണം. അതാണ് കാകളിയുടെ ഒരു പാദം. ഇതില്‍ ചെറിയ ഒരു മാറ്റംവരുത്തിയാല്‍ കളകാഞ്ചിയാകും . കാകളിയിലെ ആദ്യത്തെ വരിയിലെ ആദ്യത്തെ രണ്ടോ മൂന്നോ ഗണങ്ങളെ അഞ്ച് മാത്ര വരത്തക്കവിധം അഞ്ച് അക്ഷരങ്ങളുള്ള ഗണങ്ങളാക്കുക . അതാണ് കളകാഞ്ചി . ആദ്യത്തെ വരിയില്‍ മാത്രമേ വ്യത്യാസമുള്ളു . രണ്ടാമത്തെ വരി കാകളിതന്നെയാണ് . അഞ്ച് മാത്ര വരുന്ന അഞ്ച് അക്ഷരങ്ങള്‍ ആകുമ്പോള്‍ ഓരോന്നും ലഘുവാകണം . ഒരക്ഷവും ദീര്‍ഘം, അനുസ്വാരം , വിസര്‍ഗ്ഗം , കൂട്ടക്ഷരം , ഉറപ്പിച്ചുച്ചരിക്കുന്ന ചില്ലക്ഷരം എന്നിവ പിന്നില്‍ വരുന്നതാകരുത് . അതായത് ആദ്യത്തെ വരിയിലെ രണ്ടോ മൂന്നോ ഗണങ്ങള്‍ സര്‍വ്വലഘുക്കള്‍ വരുന്നു . ഈ ഗണങ്ങളൊഴിച്ചാല്‍ ബാക്കിയെല്ലാം കാകളിയിലേതുപൊലെത്തന്നെ . ഒരുദാഹരണം നോക്കുക .താരം : 4 മാത്ര / 2 അക്ഷരം.

താ -2മാത്ര (ദീര്‍ഘം), രം- 2മാത്ര (അനുസ്വാരം). ആകെ 2+2=4 മാത്ര.

തരണം: 4 മാത്ര / 3 അക്ഷരം.

ത- 1 മാത്ര ര- 1 മാത്ര , ണം- 2മാത്ര (അനുസ്വാരം).ആകെ 1+1+2=4മാത്ര.

തരളിത : 4 മാത്ര / 4 അക്ഷരം.

ത - 1 മാത്ര , ര - 1 മാത്ര , ളി- 1 മാത്ര , ത - 1 മാത്ര , ആകെ 1+1+1+1= 4മാത്ര.

നാല് മാത്രയില്‍ രണ്ടക്ഷരപദവും മൂന്നക്ഷരപദവും നാലക്ഷരപദവും വരുന്നതു കണ്ടല്ലോ .

മറ്റൊരുദാഹരണം കാണുക .

ഭൂതലം:3 അക്ഷരം / 5 മാത്ര. (ഭൂ-ദീര്‍ഘം, ലം- അനുസ്വാരം എന്നിവ വന്നതിനാല്‍ 2 മാത്രകള്‍ വീതം)

സമതലം: 4അക്ഷരം / 5 മാത്ര. (ലം- അനുസ്വാരം വന്നതിനാല്‍ 2 മാത്ര )

സമതുലിത : 5അക്ഷരം / 5 മാത്ര .

ഇവിടെ മൂന്നക്ഷരത്തിലും നാലക്ഷരത്തിലും അഞ്ചക്ഷരത്തിലും അഞ്ച് മാത്രകള്‍ വരുന്നു. ഇതുപോലെ കാകളിയില്‍ മൂന്നക്ഷരത്തില്‍ അഞ്ച് മാത്രകള്‍ വരുന്നത് കളകാഞ്ചിയിലാകുമ്പോള്‍ അഞ്ചക്ഷരത്തില്‍ ആണ് അഞ്ച് മാത്രകള്‍ വരേണ്ടത്. കാകളിയുടെ ഈരടിയില്‍ ആദ്യത്തെ വരിയില്‍ മാത്രമേ ഈ മാറ്റമുള്ളു . അവിടെ ആദ്യത്തെ രണ്ട് ഗണങ്ങളോ മൂന്ന് ഗണങ്ങളോ ഇങ്ങനെ അഞ്ചക്ഷരഗണങ്ങളാകണം .

കാകളിയിലെ ഒരു ഈരടി :

"ശാരികപ്പൈതലേ ചാരുശീലേവരികാരോമലേ കഥാശേഷവും ചൊല്ലുനീ "

ശാരിക / പ്പൈതലേ /ചാരുശീ / ലേവരി /

കാരോമ / ലേ കഥാ / ശേഷവും / ചൊല്ലുനീ

.

കളകാഞ്ചിയിലെ ഒരു ഈരടി :

സകലശുകകുലവിമലതിലകിതകളേബരേ
സാരസ്യപീയൂഷ സാരസര്‍വ്വസ്വമേ .

സകലശുക / കുലവിമല / തിലകിതക / ളേബരേ
സാരസ്യ /പീയൂഷ / സാരസര്‍ / വ്വസ്വമേ .

ആദ്യത്തെ വരിയിലെ മൂന്ന് ഗണങ്ങളില്‍ അഞ്ചക്ഷരം അഞ്ച് മാത്ര വരുന്നു . അതായത് സര്‍വ്വലഘുക്കള്‍ വരുന്നു . ആദ്യത്തെ വരിയിലെ രണ്ടോ മൂന്നോ ഗണങ്ങളൊഴിച്ചാല്‍ ബാക്കിയെല്ലാം കാകളിയിലേതുപൊലെത്തന്നെ .

.

രാമായണം സുന്ദരകാണ്ഡത്തിന്‍റെ തുടക്കമാണ് മേല്‍സൂചിപ്പിച്ച ഈരടി . അതിലെ സമുദ്രലംഘനം തുടങ്ങുന്ന വരികള്‍ നോക്കുക .

"ലവണജലനിധിശതകയോജനാവിസ്തൃതം

ലംഘിച്ചുലങ്കയില്‍ ചെല്ലുവാന്‍ മാരുതി ."

ലവണജല / നിധിശതക / യോജനാ / വിസ്തൃതം

ലംഘിച്ചു / ലങ്കയില്‍ / ചെല്ലുവാന്‍ /മാരുതി .

ആദ്യത്തെ വരിയിലെ രണ്ട് ഗണങ്ങളേ അഞ്ചക്ഷരഗണങ്ങളുള്ളൂ .ബാക്കിയെല്ലാം കാകളിയിലേതുപോലെ .

.

സുന്ദരകാണ്ഡത്തിലെ മാര്‍ഗ്ഗവിഗ്നം ഇങ്ങനെ തുടങ്ങുന്നു.

"പതഗപതിരിവപവനസുതനഥവിഹായസാ

ഭാനുബിംബാഭയാ പോകും ദശാന്തരേ . "

പതഗപതി / രിവപവന /സുതനഥവി / ഹായസാ

ഭാനുബിം /ബാഭയാ / പോകും ദ / ശാന്തരേ.

ആദ്യത്തെ വരിയിലെ മൂന്ന് ഗണങ്ങളില്‍ അഞ്ചക്ഷരം അഞ്ച് മാത്ര വരുന്നു . അതായത് സര്‍വ്വലഘുക്കള്‍ വരുന്നു . ആദ്യത്തെ വരിയിലെ മൂന്ന് ഗണങ്ങളൊഴിച്ചാല്‍ ബാക്കിയെല്ലാം കാകളിയിലേതുപൊലെത്തന്നെ .

.

രാമായണം സുന്ദരകാണ്ഡത്തിലെത്തന്നെ സീതാദര്‍ശനത്തിലെ ഒരു ഈരടി :

" ജനകനരപതിവരമകള്‍ക്കും ദശാസ്യനും

ചെമ്മേ വിറച്ചിതു വാമഭാഗം തുലോം."

ജനകനര / പതിവരമ / കള്‍ക്കും ദ / ശാസ്യനും

ചെമ്മേ വി / റച്ചിതു / വാമഭാ / ഗം തുലോം .

ആദ്യത്തെ വരിയിലെ രണ്ട് ഗണങ്ങളേ അഞ്ചക്ഷരഗണങ്ങളുള്ളൂ . ബാക്കിയെല്ലാം കാകളിയിലേതുപോലെ .

.

വൃത്തമഞ്ജരിയില്‍ കളകാഞ്ചിയുടെ ലക്ഷണം ഇങ്ങനെ പറയുന്നു.

കാകളിക്കാദ്യപാദാദൌ രണ്ടോ മൂന്നോ ഗണങ്ങളെ

ഐയ്യഞ്ചുലഘുവാക്കീടിലുളവാം കളകാഞ്ചികേള്‍ .

കാകളിയുടെ ആദ്യപാപാദത്തിന്‍റെ ആദ്യത്തെ രണ്ടോ മൂന്നോ ഗണങ്ങളെ അഞ്ച് ലഘുക്കള്‍ വീതമുള്ള ഗണങ്ങളാക്കിയാല്‍ ഉണ്ടാകുന്നതാണ് കളകാഞ്ചി .

കാകളിയെ അടിസ്ഥാനപ്പെടുത്തി അനേകം വൃത്തങ്ങള്‍ ഭാഷയിലുണ്ട്. കാകളിയില്‍ ചെറിയ മാറ്റങ്ങള്‍ വരുത്തിയാണ് പല ഭാഷാവൃത്തങ്ങളുമുണ്ടാക്കുന്നത്. കാകളി നന്നായി അറിഞ്ഞിരുന്നാല്‍ ഇവയെല്ലാം നിഷ്‍പ്രയാസം പഠിച്ചെടുക്കാന്‍ കഴിയും. അതുകൊണ്ട് കാകളി തെറ്റില്ലാതെ പ്രയോഗിക്കാനുള്ള പരിശീലനം ആദ്യം തുടങ്ങണം. ഇനി കളകാഞ്ചിയില്‍ രചന തുടങ്ങാം . നന്മകള്‍ നേരുന്നു.